لمّا ضحكتيلي
لمّا ضحكتيلي
بجّت الدّني ب وجّي
و صار الفرح أنهار
نوافير معوجّة
و أجّت عواصف نار
شراقيط مرتجّة
و شتّت ورق دولار
و اتكسّرت قجّة
انقليت بيضة صفار
و تحوّلت عجّة
لمّا ضحكتيلي ...
لمّا ضحكتيلي ...
حليت عناقيد كتار
و استويت الفجّة
و فلشت الغيمة غبار
نفخة بعد مجّة
مجّة من السّيكار
اللّي عم تحرقو الوهجة
حلمي حملني و طار
عَ صوت عصام رجّي
ب ضيعة شفت كنار
ب تغريدو في ضجّة
و راعي في حدّو حمار
صار يقرا و يهجّي
الحبّ حرفين زغار
شافن على وجّي
لمّا ضحكتيلي ...
لمّا ضحكتيلي ...
رقصوا عواميد الدّار
رقصات مرتجّة
و طجّ حدّي "درسّوار"
و نقزت من الطّجّة
و سمعت على الأخبار
إشاعة معوجّة
قال بدّك ياني غار؟
إي قرّبي عطيني ... حجّة