بيت عتابا على عتبة بيت - 2
جيت لَ عندك و قلبي معي كمان جا
إنتَ إلي كمهرب كملجأ كمنجا
خدي الدّربكّة و بِ ضهرا الكمنجا
و قلبي الحزين بيعزف عَ الرّباب
مش معصّب لأنّو في بعيني رمشاية
و مش قهوتي اللّي معصّبتني و مش شايي
معصّب لأنّك لابسة مشّاية
و أنا اللّي بعيدك هديتك قبقاب
ناطر شي فرصة تَ إأمر و أمرت : خي!
ما حدا غريب اللّي أمرتا مرت خيّي
قلتلّا إيدا لَ مرتي اليوم مرتخيّة
عطيني المكواية أمرتني بالتّياب
بعرف حبيبتي بالإخلاص معجونة
لكن ما بعرف لي تَ ضهرت مع "جوني"
شبيبة صيدا احتجّت مع جونيه
شو جوني شاب و نحنا مش شباب؟
صديقي طوني و مرتي بيبسطوني
بلعبة ورق كبّا دينارس و يستوني
كلّ ما تغطّ عيني بسمع : "بس طوني
جوزي بيخفّ نومو ب شهر آب"
حفلة ملكة جمال الكون مسكونة
ب رجال شرطة بس شافوني مسكوني
قلتلّن : أنا حبيبتي ب نظري "مس" كوني
و سرقة التّاج لَ راسها حلال