View Single Post
Old 03-02-2012   #48
mr_j
Community Moderator
 
mr_j's Avatar
 
Last Online: 09-26-2018
Join Date: Oct 2007
Posts: 2,518
Thanks: 3,021
Thanked 2,076 Times in 1,156 Posts
Groans: 7
Groaned at 34 Times in 27 Posts
Default

المرا متل الزيتون ما بتحلى تتنرص

هذا جزءٌ مما قالته إحدى المعنفات في إحدى مناسبات كفى.

*إهداء خاص إلى كل من يريد شطب العنف المعنوي والعنف الإقتصادي والإغتصاب الزوجي من مشروع قانون حماية المرأة من العنف الاسري، وأيضاً إلى من أضاف المادة 26 لينسف القانون من أساسه.





أنا اليوم هون لإحكي معاناتي، ولوصل صوتي وصرختي لمجلس النواب، ولكل إنسان عندو ضمير حي. بيقولوا ما في إغتصاب زوجي، من حقو الرجل يعمل بمرتو يلي بدو إياه، وينام معها بالطرق يلي بدو اياها، وساعة يلي بدو، فانا راح احكي جزء صغير من معاناتي.



أنا أم لاربع أولاد، كنت اشتغل من مصبحها لمغربها، من 6 الفجر لل6 المسا، إشتغل بالبيوت، وأشطف دراج ونظف مكاتب. اجي على بيتي عندي مسؤولية ببيتي، بدي طعمي ولادي، بدي إغسلهن، بدي حممهن. يعني ما يجي الليل لحتالي كون تلفانة، من حقو هالجسد يرتاح. المحروس كانت شغلتو طول الليل على الأفلام الاباحية، وطول النهار نايم. يجي بدو يسهرني معو، قلو أنا اليوم تعبانة، مش قادرة، يبلش ضرب فيي ، يقلي وين شفتي النسوان، النسوان بتتكحل، بتتحمر، بتسهر مع رجالها، إنت مرا إنت؟؟ وينزل ضرب فيي، يقلي المرا متل الزيتون ما بتحلى تتنرص. يبلش يشلخلي تيابي، ويعمل يلي بدو إياه.



مرة اجا من برا معصب محشش وفش خلقو فيي واكثرية الأوقات كنت أعملو يلي بدو إياه، عشان ما اجي لاقي أولادي مصبغين ومدبغين ومصلوبين عالحيطان. اجا معصب محشش وفش خلقو فيي، شحطني على الحمام، حطلي راسي بجورة الحمام ، وحط اجرو على رقبتي وقلي هون مكانك، ما إنت بتنظفي جور الحمامات. جاب عصاية تخينة ونزل ضرب فيي، ظلو كل الليل يتسلى فيي، لكسرلي إيدي وصبغني تصبيغ، طلعت من تمي كلمة بدي إشرب أنا وعم موت، أنا وبين الأموات، سحبني بشعري لنص الأوضة، وجاب إبريق المي صار يكتلي إياه على راسي ويقلي تشربي سم! ويلبط فيي، ورجع سحبني على الفرشة، يا ريت إكتفى بالقتلة يا ريت إكتفى بالنومة إلا حطني بالفرشة وقعد يقرص فيي ويعضوض فيي ويضرب فيي بالبكوسي ويقلي شلحيني وشلحي، وعملي هيك وسوي هيك، وانا بين الأموات ما قادرة حرك لا ايديي ولا اجريي. والاولاد نايمين تحت الحرام شايفين بعينهن شو عم يجري وشو عم بيصير، خيفانين إنو يجي الدور ليهن.



أنا يوم إلي ولدت بنتي، ليلة يلي ولدت بنتي، نام معاي وانا سابحة بدمي، إيه أي قانون، أي شرع، أي دين بيعطي الحق للزوج يعمل بمرتو هيك ؟؟؟ أكيدي ما في لا دين ولا شرع ولا قانون بيرضى بهالشي، بس عنا ما عم يتطبق لا شرع ولا قانون. لمن ولدت ابني كان إلي أربعة أيام مولدة، اجت إمو لعنا قالتلو بدي آخذ البنت كرمال تهتم بالصبي. بنتي عمرها سنتين، قلتلو أنا ما بقدر أقعد بلا بنتي، أنا قلت هلكلمة والبوكس كان جايي على عيني، حسيت عيني طارت، ما إكتفى بهيك، قام جاب عصاية إلها دنكورة، ونزل طرق فيي وإمو قاعدة عم تتفرجى، قلي يلا قومي ضبيلها تيابها، إذا بقلك اللبن أسود بتقولي أسود، أخد البنت واخد إمو وقفل علي الباب [ ] وداهن على الضيعة ورجع اجا، فات عنتر، فتح الباب [ ] سحب قضيب الحديد ونزل نفض فيي، كأنو في صوف قدامو وعم ينفض فيهن، ظل يطرق فيي لحتالي هلك، وبعد ما هلك زتني بالأرض، وبلش يشلخلي بتيابي ويعمل يلي بدو إياه، وما إكتفى بهيك. راح جاب لحمة، وقلي إقليبلي اللحمة، هو يلي مخلف وهو يلي بدو يرضع، هوي بياكل اللحمة وانا باكل العصي.



كنت ضاهرة بدي روح عشغلي الساعة 6 الصبح، شحطني عن الباب ونزل ضرب فيي، جاب شريط كهربا جدلو تجديل ونزل ضرب فيي[ ] بعد ما خلص بقلي فرجيها للمرا يلي رايحة تشتغلي عندها بلكي بتشفق عليك بتعطيكي مصاري، ما كفاه المصاري يلي عم ياخذها ويحشش فيها، صار بدو يشحد علي كمان، يعني ما خاف إنو الناس يعرفوا شو عم يعمل فيي، لانو عارف ومتطمن إنو ما في قانون يحميني.



اجا رفيقو لعندو أخدو يسهر، قلت أنا عال لحتالي نام، إستغليت الفرصة لأني ما أعرف النوم شو هوي. نيميت ولادي ونمت. فقت بالليل عم بيربط فيي، فقت مرعوبة، شو عم تعمل فيي؟ سفني كف على تمي وقلي سكري بوزك. ربطني كل إيد مع اجر ، ونام معي وقعد يقلي أنا عم إغتصبك. حضرلو شي فيلم هو ورفيقو واجا يمثلو فيي. كان قادر ينام بمحبة وإحترام، بس لأنو إبن حرام وبيحب الحرام وما في قانون يحاسبو.



[ ] أنا هلق فل عني، فل راح تجوز وصار عندو ولاد. من فترة بيدق، بيحكي معو الصبي، قلو يا بابا عم تضرب ولادك متل ما كنت تضربنا؟؟ قلو سكوت يا ابني، إذا بعيط عإمهن بيجي البوليس ياخدنيبتمنى لو كنت بلبنان تأشلخ كل ولد شقفتين. لأنو عمل فيي مسلسلات رعب وما حدا حاسبو.

[ ]أنا لو موتني مرة كان إرتكب جريمة وحدة فيي ، بس أنا كل يوم كان يعمل فيي وبولادي مليون جريمة وما حدا حاسبو
__________________
"Loyalty to the country always. Loyalty to the government when it deserves it. "
-Mark Twain
mr_j is offline   Reply With Quote